Сәләтнең иң иҗади сменасында лабораторияләр ← кире кайтырга

Бу көннәрдә Биләр музей-тыюлыгы территориясендә «Сәләт» форумының икенче сменасы уза. Форумның иң иҗади сменасы сәләтле балаларның, талантлы яшьләрнең һәм аларның җитәкчеләренең музыка, театр сәнгате һәм бию юнәлешләрендә иҗади потенциалын тормышка ашыру һәм үстерү мәйданчыгы булып тора. Иҗат Биләр Форумның уку-укыту программасы уникаль: ул үз эченә Татарстан Республикасының һәм Россия Федерациясенең башка төбәкләренең әйдәп баручы белгечләре тарафыннан катнашучылар һәм аларның җитәкчеләре өчен әзерләнгән күп санлы лекцияләр, остаханәләр, тренинглар, иҗади очрашулар, лабораторияләрне ала.

Смена турында тулырак юнәлеш җитәкчеләре Лилия Нурель, Лия Магнавеева, Венера Галимова, «Остаз» проекты җитәкчесе Диләрә Якубова һәм чакырылган белгечләр Нурбәк Батулла һәм Зәринә Вилданова белән сөйләштек.

Лилия Нурель: Сәләткә бөтен республикадан шулкадәр талантлы балалар килә! Алар өчен белем, яңа тәҗрибә туплау һәм яңа кешеләр, кызыклы спикерлар белән танышу өчен искиткеч мөмкинлек бар. Без театр юнәлеше өчен үз эченә актерлык осталыгын да, пластиканы да алган киң программа төзергә тырыштык. Балалар сәхнә сугышын һәм хәрәкәтен өйрәнәчәк, үз тавышлары өстендә эшләячәк һәм театрның нәрсә икәнен һәм аның ничек оештырылганын беләчәк.

Сәләт – ул яшьтән үк тормышка дөрес рухи мөнәсәбәт урнаштыручы фәлсәфә. Монда һәркемнең үзенең булдыра алачагына ышанычы уяначак.

Нурбәк Батулла: Сәләттә балалар да, остазлар да заманча мәгълүмат өйрәнәләр. Җитәкчеләр яңа тәҗрибә алып, яңа иҗат ысуллары белән танышса, алар балалар белән тәңгәл килерләр иде дип уйлыйм. Шулай итеп, остазлар укучыларга, ә укучылар остазларга ярдәм итәчәк. Бу алым файдалы булыр дип өметләнәм.

Зәринә Вилданова: Сәләт – минем өчен иҗат, минем иҗатлы гаиләм. Мондагы кешеләр, барлык биналар минем өчен иҗади мөһит тудыра. Минемчә, Сәләттә һәркем өчен дә яңа тормыш башлана, төрле юллар ачыла. Сәләткә ничә яшь булуга карамастан да, ул мәңге яшь булып калачак. Чөнки аның язмышы яшьләр кулында.

Лия Магнавеева: Монда иҗат төрләре сублимациясе бара: театр, бию һәм музыка. Минемчә, алар бер-берсенең аерылгысыз өлеше. Быел без программабызны тагын да кызыграк ясарга булдык. Бездә өч төрле лаборатория барлыкка килде, аларга без искиткеч сәләтле егет-кызларны алдык. Ел саен без үзебезнең программага яңалык кертергә тырышабыз: быел сәхнә хәрәкәте, актерлык осталыгы һәм вокал буенча остаханәләр әзерләдек. Күз алдыгызга китерегез, бер сәгать егерме минут эчендә балалар җыр яза ала! Кемдер сүзләр, кемдер музыка, ә кемдер бит яза, һәм шәп нәтиҗә килеп чыга.

Сәләт илһамлану мөмкинлеге бирә, чөнки иртәннән кичкә кадәр балалар музыка, җыр һәм бию белән шөгыльләнәләр. Сәләт минем өчен илһам чыганагы.

Диләрә Якубова: Бу сменага балалар үзләре генә түгел, ә остазлары, укытучылары, җитәкчеләре белән килделәр. Без алар өчен инде өченче ел кызыклы остаханәләр әзерләргә тырышабыз. Мәсәлән, төрле иҗади эчке халәтләр белән эшләргә һәм балаларга ярдәм итәргә, проектларга юл табарга, тавыш белән идарә итәргә өйрәтәбез. Ә быелгы сменың яңалыгы – ул лабораторияләр. Өч көн дәвамында безнең остазлар ике лабораториядә эшли. Узган елны остазлар балаларның чыгышына карап кызыкканга, быел алар өчен дә лаборатория форматын керттек.

Минемчә, Остаз проекты бик әһәмиятле. Балаларга үсеш мөмкинлекләре бирер өчен остазларның үзләренә да үсәргә кирәк, һәм монда без алар өчен шундый мөһит тудырабыз.

Венера Галимова: Без балаларга гына түгел, ә остазларга да махсус программа төзибез. Быел Остаз проектына инде өч ел, һәм аның эчендә махсус программа кысаларында иҗади лабораторияләр узачак. Балалар белән бергә остазлар да смена ахырында иҗади нәтиҗәләрен күрсәтәчәкләр.

Сәләт – мөмкинлекләр тудырган мөһит. Балаларга, киләчәк буеннарга әлеге мөһитне булдырырга өлешемне кертә алу белән мин бик горурланам.