Iñ-iñnärneñ iseme bilgele! VI «Sämrux» el premiyase näticäläre ← kire kaytirga
Tantananı «Sälät» yaşlär üzäge citäkçese Aygöl apa Gabdraxmanowa sälamläü süzläre belän başlap cibärde: «Barlık sälkeşlärgä, äydamannarga, başcitäklärgä, äti-änilärgä, partnerlarga häm ostazlarga bik zur räxmät! El däwamında bezgä yardäm itep torgan barlık ministrlıklarga, Tatarstan respublikasınınıñ xökümäte, Röstäm Nurgali ulı häm anıñ komandasına aerım räxmät! 2020 nçe el Sälät öçen bik uñışlı ütte. Köçle komandadan başka, mondıy näticälärgä ireşep bulmas ide. Bügen monda nindi genä xislär kiçermibez: nominantlar da, alarnıñ äti-äniläre, ukıtuçıları da bik nık dulkınlana. Tantanaga kilgän barıgızga da bik zur räxmät!» - dip söyläde ul. Aygöl Gabdraxmanowa Sälät stipendiyasen tapşırdı häm «El ostazı» nominatsiyasendä ciñüçe Rimma apa Ibrahimowanı büläkläde.
Sälätne bäyräme belän kotlarga bik küp ministrlıklar, wedomstwolardan wäkillär kilgän ide. Alar – härdaim Sälät belän bergä atlauçı, yardäm itep toruçılar. Säxnägä çıgıp süz äytüçelär häm ciñüçelärgä premiyalär tapşıruçılar arasında TR sport ministrı urınbasarı Almaz Miñgolow, TR yaşlär eşläre ministrınıñ berençe urınbasarı Timur Söläymanow, TR mädäniyat ministrı urınbasarı Damir Natfullin, TR däülät idaräsen tsifrlı nigezdä üsterü, mäglümat texnologiyaläre häm elemtä ministrı urınbasarı Radik Gıysmätow, Kazan şähäre başkarma komitetınıñ Balalar häm yaşlär komitetı räise Ayrat Fäizow, «Ak bars bank» açık aktsionerlık cämgıyateneñ däülät sektorı belän eşläü buença direktorı Emil Xäyretdinow bar ide.
«Sämrux» premiyase – ul törle ellarda Sälättä bulgan keşelärneñ oçraşu urını. Bez härberebez törle, läkin şul uk wakıtta ber dulkında! «Sälät» - balalarga, yaşlärgä üz potentsialın açarga mömkinlek birä», - dip bilgeläp ütte TR Yaşlär eşläre buença ministrınıñ berençe urınbasarı Timur Söläymanow.
Sälät böten respublika häm Rossiya töbäklärennän distälägän meñ bala häm talantlı yaşlär öçen çın mömkinleklär mäydanı ikänlegen kilgän kunaklar da assızıkladı. Liderlık häm duslık töşençäläre berençe urında buluı turında äyttelär.
Bıelgı «Sämrux» el premiyase ciñüçeläre:
«El sälkeşe» - Nariman Wildanow
«El äydamanı» - Zölfiya Xäsänowa
«El ölkän äydamanı» - Dilärä Xaewa
«El direktorı» - Ayaz Xänäfin
«El klubı» - «Sälät-Tübän Kama»
«El kuldaşları» - Aygöl Şakirowa, Daniyar Galiew («Sälät – Ak Büre»)
«El alanı» – «Sälät-Saba»
«Forum başcitäge» – Liliya Akberowa
«Sälät cırlıy» – «Ruxi yöräk» (Süz häm köy awtorı, başkaruçı: Dinä Wäliewa)
«El initsiatiwası» – «Çeltär» media mäktäbe (proekt awtorı: Renata Şäripowa)
«El ostazı» – Rimma Ibrahimowa
«El partnerları»
— Röstäm Däülätşin («Aznakay» sanatoriy-profilaktorie häm anıñ baş tabibı);
— Fänir Galimow (Rossiyaneñ maktaulı energetigı, Tatarstannıñ atkazangan artistı, Başkortstannıñ atkazangan mädäniyat xezmätkäre, Tuymazı şähäreneñ şäräfle şäxese, «Ilfa» CÇC direktorı)
Sälät üseşenä zur öleş kertkännäre öçen Xänäfin Ayaz häm Zäynullina Läysän Sälät stipendiyasenä laek buldılar.
Ciñüçelärgä «Sämrux» sını, diplom, partnerlardan kıymmätle büläklär häm fund.selet.biz platformasında tuplangan akçalata premiya tapşırıldı. Teläge bulgan här keşe fund.selet.biz fondına üz öleşen kertä aldı. Bitaraf bulmagan keşelär yardäme belän fondta 500 meñ sumnan kübräk akça cıeldı.
