Bügennän alar Asıltaşlar häm Gäühärtaşlar! ← kire kaytirga
11 oktyabr könne Sälät «Almagaç» mäktäbendä nänilärebezneñ cırlı-biyule çıgışları belän ürelep bargan bagışlau kiçäse uzdı. Tantanada sälätle ukuçılarıbız räsmi räweştä «Asıltaş» häm «Gäühärtaş» isemenä laek buldı.
Sälät «Almagaç» mäktäbe xäzerge wakıtta 107 nçe «Açış» gimnaziyasendä urnaşkan. Anda 1-6 nçı Ä saflarında 145 ukuçı belem ala. Şulay uk, mäktäpkäçä äzerlek däreslärendä bulaçak berençe saf ukuçıları atna saen däreslär ala.
«Almagaç» mäktäbe zamança belem birü alımnarına nigezlängän. Mäktäpneñ töp maksatı – progressiw karaşlı, XXI gasır taläplärenä cawap birä alırlık, tatar, rus häm çit tellären yaxşı belgän, törle mädäniyat wäkilläre belän aralaşa belüçe, tugan yaknı yaratuçı, ruxi yaktan bay şäxeslär tärbiyaläü. Mäktäp ukuçılarnıñ intellektual häm icadi üseşenä zur igtibar birä. Ul belem birüneñ mäktäpkäçä häm mäktäp etapların berläşterüne küz uñında tota häm üz eçenä üzara bäyle berniçä etapnı ala: Encekäy (balalar bakçası, 3 yaştän 6 yaşkäçä bulgan balalar), Märcän (balalar bakçası, äzerlek törkeme), Asıltaş (1-4 saflar), Gäühärtaş (5-7 saflar), Çäçäk (8-9 saflar) i Alma (10-11 saflar).
Mäktäptä «Tatar uennarı» kebek tatar tele däresläre ütkärüneñ interaktiw formatların kertü, belem birü moxite buldıru häm uku äsbapların bizäüdä tatar telen kullanu, anı därestän tış eşçänlekneñ töp tele bularak kullanu, tatar telendä cırlar başkaru aşa tatar telen öyränügä häm tatar mädäniyate moxitendä buluga basım yasala. Mäktäp kalendare berläşmä kalendare belän täñgälläşterelgän, häm ukuçılar el däwamında telne öyränüdä moxit ısulı gamälgä aşırıla torgan Sälät çaralarında katnaşalar. Ukıtu modulläreneñ berse - «Almagaç alanı» - Sälätneñ «awılga kaytu» kontseptsiyase kısalarında tatar telle moxittä kaynau printsibı gamälgä aşırıla torgan belem birü alanı. Şulay itep, tatar telen belüneñ başlangıç däräcäse törle bulgan ukuçılar, tatar telen üzläşterügä karata kızıksınunı yugarı däräcädä saklap, üzläreneñ tel belü däräcäsen üsterälär.
