Ädip Älmirgä sorau bir

Adilä Safina, «Sälät-Bolgar»
Isänmesez, Jäüdät Abıy! Min «Sälät»tä 2 el gına ele. Mömkinlegez bulsa, «Sälät-Çistay» yasagız ele! Räxmät!

Adip Almir:

Sälam, Adilä!

Aktiwlıgıñ öçen räxmät! Älbättä, Çistayda Sälät alanı oeştıru ideyası miña oşıy. Bez bit inde 1998 elda Çistayda Sälät alanı ütkärgän idek. Dimäk, bu Çistayga yañadan kaytu bulır ide. Monıñ öçen närsä kiräk soñ? Eşne närsädän başlarga?

Bu soraunı sälkeşlär eş birä, şuña da, fälsäfägä kerep kitmiçä, konstruktiw cawap biräm.

1.     Yaşlär belän eşläü häm sport ministrı häm «Sälät» fondı general direktorı isemenä rayon  glawası isemennän «Sälät-Çistay» alanın oeştıru täkdime belän xat yazırga kiräk.  

2.     Ul xatta alannı uzdıru, el däwamında  alanga sälätle balalarnı Sälät oeşması belän bergäläp tuplau, äydamannarnı bergäläp äzerläü  teläge häm, töp şartlarnıñ berse bulıp,  rayonda Sälät alanı ütkärü öçen 60-100 keşelek uku-ukıtu, sälamätländerü bazası buluı  kürsätelergä tieş.   

3.     Bu eşne başkarunıñ iñ kıska yulı:  üz tiräñä fikerdäşläreñne cıep (alar sälkeş bulmaska da mömkin) mäktäp direktorı aşa (direktor belän bergä bulsa, tagın da äybät) rayon mägarif bülegenä çıgıgız (ya turıdan-turı idarä citäkçese belän oçraşıgız). Telägegezne añlatıgız, mägarif mödire belän kiñäşläşep, glawa isemennän min alda äytkän xatnı äzerlägez. Mägarif mödire alga taba närsälär eşlärgä ikänen sezgä  üze äyter. Ägär Sälät alanı ütkärergä teläkläre häm mömkinlekläre bulsa, Glawa isemennän xat äzerlägändä,  mägarif mödire üze ük başta Sälät oeşmasına möräcägat itäçäk. 

Menä şul yul belän barganda, kiläse elga bez inde «Sälät-Çistay» alanın planga kertä alaçakbız.

Uñışlar telim!

 

Ruslan Fäyzullin, «Izge Çişmä» alanı direktorı:

Isänmesez, Cäüdät abıy!

Sezgä şundıy sorau bar ide.

Bez «Izge Çişmä» alanına äzerlänäbez. Bik yaş kontingent, kiçäge sälkeşlär. Kübesençä kızlar yazıla.

Ägär mömkin bulsa, «Izge Çişmä» alanı turında berniçä süz-cömlä yazsagız yaxşı bulır ide. Anıñ tarixı, kiläçäge, teläkläregez...  

Isän bulıgız!


Adip Almir:

Sälam, Ruslan!

Siña häm komandaña, barlık «Izge Çişmä»lelärgä küp sälamnär!

«Izge Çişmä», belgänegezçä, 2000-nçe elda oeştı. Berençe ellarda anda 50-läp student häm xätta olırak yaştägelär dä katnaşa ide. Ul härwakıt «Bilär kalası» smenası belän ber wakıttarak, Çirmeşän elgasınıñ sul yagında, çatırlı alan bularak ütkärelde. Alannıñ eçtälege eldan-elga üzgärä kilde, ämma anıñ töp ideyası – student yaşenä citkäç tä, Sälättän aerılırga telämägän studentlar öçen oçraşu, Sälät moxitendä tagın ber el bulsa da duslar belän bergä bulu, başka alannarda buluçılar belän tanışu, duslaşu, alga taba şul kontingenttan Sälät alannarına äydamannar çakıru ide. Yagni monı ul wakıttagı cäyge äydamannar, direktorlar mäktäbe disäñ dä döres bulır.  Üzenä kürä bu studentlar öçen tormış mäktäbe dä buldı. Kızlar aş-su äzerli, egetlär uçaknı karap tora, su kiterä, ukular, tellär öyränü, törle uennar,  törle kiçälär.  Mäktäp yaşendä kilmi kalgan, Sälät turında soñrak işetep, Sälätkä kilü teläkläre student ellarında uyangannar öçen dä «Izge Çişmä» Sälät moxitenä, Sälätkä kerep kitärgä bik äybät mömkinlek bulıp çıktı.   «Izge Çişmä» alanı härwakıt cıennarda, forumnarda aktiw katnaştı. Studentlarnıñ kiçke çaradagı çıgışların balalar bik yaratıp karşı ala ide. «Izge Çişmä» alanında tugan «Palatka, uçak häm gitara» cırı bügen dä Sälät xitlarınıñ berse! 

«Izge Çişmä»neñ Bilär forumı öçen  alıştırgısız potentsial, wolonterlar mäktäbe ikänlege dä açıldı. Inde küp ellar Bilär forumınıñ şundıy matur, uñışlı ütüendä «Izge Çişmä»dä katnaşuçılarnıñ  öleşe bik zur. Monıñ öçen min «Izge Çişmä»lelärgä aeruça räxmätle.

Bu alanda kızlar küp buluına min şatlanam gına, alar bit yaña buın sälkeşlärne Sälätkä kiteräçäk, bişek cırları itep Sälät cırların da cırlayaçak. Bu şatlandıra. Egetlärgä dä şatlanam. (Kölä) Berençedän, kızlarga küñelsez bulmas ide, ikençedän, alannıñ  ber öleşendä wolonterlar funktsiyase dä bar. Forumda törle eşlär çıgıp tora, awır kütärülär dä bar, kütärep-küçerep kuyular da – monda egetlär kiräk.

Yaşlärneñ küpläp kilüe dä añlaşıla. Sälät bit ul gailä. Gailädän, duslardan tiz genä aerılıp kitep bulmıy. Şuña da, aeruça äle yaña gına sälkeş bulgan studentlar tartıla. Ä olıraklar, xätta inde törle eşlärdä eşläp tä «Izge Çişmä»gä tartıluçılar – alar inde, kübesençä, sezneñ alannıñ weterannarı. Bälki gailä koru öçen matur kız, yä batır eget küzläüçelär dä yuk tügelder. «Izge Çişmä»dä ber-bersen tabıp, mäxäbbät utı kabıngan, alga taba gailä korıp cibärgän «Çişmä»lelär dä az tügel bit. «Izge Çişmä»neñ maksatları häm anıñ mägnäse digändä monı da istän çıgarırga yaramıy.    

Yaña traditsyalär kertergä tırışıgız, şunda tuylar uzdırıp, tora-bara gailä belän, balalar belän kilep, «Izge Çişmä»ne Sälät dönyasına üzenä ber tös östäp, gailälär dönyası bulıp yaşi torgan itegez! Sezneñ yanga bolay da inde xäzer weterannar tuplana, gailäläre belän kilälär. Dimäk, bu xäräkät bar inde, äzräk formalaştırası, aldan urtak plannar korası gına kala.

Bilärdä bezneñ tamırlarıbız. Biredä gasırlardan gasırlarga bezneñ ruxıbız, energiyabez tuplanıp kilgän. 1997-nçe eldan «Izge Çişmä» yanında, Xucalar tawında Bilärgä mäñgegä kaytkan sälkeşlär tawışı yañgırıy. 

Kürep torasız, Sälät Bilärdä üsä, nıgıy. Xäzer inde Bilärdä üzebezneñ «Fänsar» fänni uku-ukıtu üzägebez dä bar, tora-bara üzebezneñ litseebız, uniwersitetıbız  da bulır. Bilärdä Sälät fännär akademiyase üsär.   Şuña da «Izge Çişmä» alga taba Bilärdäge  kadrlar üsterü alanı bulır dip tä ışanabız. 

«Izge Çişmä»neñ kömeş xakıykat fonında yaşel imän yafragı töşerelgän  üz flagı, üz tösmere, üz ideyası, üz traditsiyaläre bar.  «Izge Çişmä» Sälät moxitendä nık tamırlı häm anıñ kiläçägen dä ömetle küräm.  

«Izge Çişmä 2017» alanında katnaşuıgız üzegezgä faydaga bulsın, monda ütkärgän könnär häm tönnäregez bıelgı cäyneñ iñ matur mizgelläre bulıp isegezdä kalsın, tormışıgıznı bizäp torsın! Uñışlar telim! 

Sabir Galimullin, Samara, «Yaktılık» mäktäbe:
Cäüdät abıy, şundıy sorau: uku yortlarınıñ Sälät klublarına nindi kiñäşlär birer idegez? Räxmät!

Adip Almir:
 Sälam, Sabir!
Iñ berençe itep şunı assızıklap, açıklap kuıyıyk. Sälät klubları ike kanatlı koş kebek. Ber kanatı mäktäp. Ikençe kanatı – Sälät. Uku yortlarında oeşkan Sälät klubları ber yaktan alar Sälät dönyasın berläşterüçe zur Sälät klubınıñ ber öleşe. Ikençe yaktan – urındagı här Sälät klubı üzegez ukıgan mäktäpneñ, uku yortınıñ aerılmas ber kisäge, ber aktiw üzäge dä. Şunnan çıgıp fiker yörtergä, eş itärgä kiräk. Konkret kiñäşlärem dä şuña bäyle.

1. Sälät klubı ägzaları Sälät printsipaları belän yaxşı tanış bulırga häm şul printsiplarga tayanıp xäräkät itärgä tieş. Tatar telen belü, tatar telendä söyläşü – bu Sälät klubı ägzası bulu öçen töp şart.

2. Sälät klubına ägzalarnı nıklap saylap alırga kiräk. Sälät balalarnıñ intellekt-icat sälätlären üsterü moxite, fän-belemgä tartıluçı balalarga yardäm itü moxite. Şuña da Sälät klubında ukuda aldıngılar, belemgä, fängä tartıluçılar, icatçılar bulırga tieş. Sälät klubı san artınnan kumıy, iñ möhime – sıyfat!

3. Sälät klubınıñ barlıgı, bar ikänlege, kaynap torgan aktiwlıktan tügel, eş näticälärennän kürensen. Äytik, sezneñ tırışlıgıgız belän mäktäbegezdä tatar telenä mäxäbbät artsın, tatar telle moxitneñ nıguı sizelsen, mäktäbegezneñ rayonıgızda, şähäregezdä däräcäse artsın, olimpiadalarda ciñüçelär sanı artsın, törle predmetlardan BDI kürsätkeçläre üssen. Menä şundıy klub ul çın Sälät klubı bula inde.

4. Sälät klubı üz eşçänlege planın tözegändä üzäktäge Sälät plannarın nigez itep, üzeneñ mäktäbendäge çaralarnı da kertep tözergä tieş. Sälät dönyası cäyge alannarga kilgän köçle balalar belän nıgıy, üsä. Şuña da üz mäktäbegezdän, üz töbägegezdän belemgä, icatka tartılgan balalarnı barlap Sälät uku-ukıtu-sälamätländerü alannarına cibärü – klublarnıñ töp wazıyfalarınıñ berse. Ul balalar alga taba sezneñ klubnıñ aktiwistları da bulıp kitäçäk.

Tagın ike aerıp äytäse kiñäşem: 

1. Üzegezneñ uku yortıgız, mäktäbegez citäkçeläre belän, direktorıgız, rektorıgız belän härwakıt kiñäşläşep, alarnıñ fatıyxasın alıp eşlägez. Alar sezne üz yardämçeläre itep kürgändä, eşläregez küpkä caylı barır. Başkaça mömkin dä tügel. Ukıtuçılarıgız sezne üzläreneñ tayanıçı itep toysın. Alar da, bez dä mäktäplärdä uku-ukıtu sıyfatı üssen, balalar töple belem alsın dip tırışabız.

2. Sez Sälät klubı aktiwistları. Ämma şul uk wakıtta mäktäp ukuçıları da. Ukudagı kürsätkeçläregez äybät bulganda häm üzegez dä şäxes bularak başkalarga kızıklı bulganda gına Sälät klubınıñ awtoritetı bulaçak. Artık mawıgıp kitep, şunı hiç istän çıgarmagız.
Isem:
Email: