Bergäläp mäglümati texnologiyalär dönyasına çumabız! ← kire kaytirga
22-26 iyul könnärendä Bilär muzey-tıyulıgında X Xalıkara «Sälät» yaşlär uku-ukıtu forumınıñ bişençe smenası – IT BILÄR FORUM uzaçak.
IT BILÄR FORUM mäglümati texnologiyalär keşe tormışınıñ böten ölkälärendä dä möhim rol uynawına ışanuçılarnı berläşterä. Forumnıñ töp yunäleşläre: IT häm mägarif, IT-trendlar, IT häm biznes. Smena wakıtında alarga kagılışlı profille ostaxanälär häm mäglümati mäydançıklar oeştırılaçak.
Belgeçlär katnaşında uzaçak diskussiya mäydançıkları katnaşuçılarnı mawıktırgıç tsifralı dönya belän genä tügel, eşmäkärlek yunäleşe belän dä tanıştıraçak.
Forum katnaşuçıları – töbäk Sälät klubları liderları, Tatarstan Respublikasınıñ mäktäp yaki rayon aktiwistları, başka töbäklärdä ütkän fän olimpiadaları häm konferentsiyalärneñ prizlı urın iyaläre yaki Sälät oeşmasınıñ profille smenalarınıñ bersenä saylap alu etabın uzgan ukuçılar.
Forumda mäglümatnı näticäle ezläü häm eşkärtüneñ aktual instrumentlarına, innowatsiyale produktlarnı tormışka aşıru häm yasalma intellekt tudıruga bagışlangan profille ostaxanälär häm uku-ukıtu mäydançıkları eşläyaçäk.
Smenaga spiker bularak çakırılgan kunaklar arasında Tatarstannıñ top-blogerı, blogosfera häm şäxsi brend buença spiker, Tatarstan Respublikası Yaşlär eşläre ministrlıgı karşındagı ictimagıy sowet ägzası Alinä Gimaltdinowa, prodyuser, telewizion programmalar rejisserı belgeçlege buença Mäskäüneñ telewidenie mäktäben tämamlauçı Nadejda Boldowa, SkySmart onlayn-mäktäbe ukıtuçıların adaptatsiyaläü bülege citäkçese, produkt-menedjer Darya Bondarewa, programmalaştıruçı, üz yunäleşe buença Çikagonıñ Illinoys uniwersitetı grantın otuçı (University of Illinois at Chicago) Darya Sabirowa, wideomeyker Artem Pronin, Ozon mäglümat sistemaların uylap tabuçı Dmitriy Xolodow, Mäskäü politexnika uniwersitetı mögallimnäre bar.
Forumda uku-ukıtu yunäleşennän kala, sport häm mädäni çaralar da ütkärelä. Smena barışında «Närsä? Kayda? Kayçan?» intellektual turnirı uzaçak. Anı «Närsä? Kayda? Kayçan?» telewizion uenında Bällür yabalak iyase Denis Galiäkbärow alıp baraçak.
Bıel Sälät moxitenä öydän çıkmıyça gına da çumarga mömkin. «SeletLive» proektı forumdagı wakıygalarnı karap barırga, onlayn-rejimda yañalıklar belän tanışırga mömkinlek birä. Translyatsiyalär forumnıñ räsmi akkauntlarında: Instagram, WKontakte häm YouTube wideoxostingında alıp barıla. IT BILÄR FORUM däwamında här kön 18:30da turı efirga kuşılırga mömkin.