«Sälät - Arşan» alanı – cäyne diñgez buenda ozatu häm yaña uku elına äzerlänü öçen menä digän mömkinlek kire kaytirga

«Sälät - Arşan» alanı – cäyne diñgez buenda ozatu häm yaña uku elına äzerlänü öçen menä digän mömkinlek

Kiçä «Sälät» yaşlär üzägeneñ Kırım Respublikası, Foros bistäse, «Sälät – Ak Bars» yaşlär üzägendä ütüçe öçençe smenası - «Sälät - Arşan» alanı sälkeşläre yulga kuzgaldı. Liderlık sıyfatların üsterü häm mäglümati texnologiyalärne öyränügä bagışlangan smenada balalarnı aldıngı belgeçlär häm kızıklı uku-ukıtu programması kötä.

Alannıñ tarixı nindi? Yalnıñ kurkınıçsız uzuında şiklärgä urın barmı? Sälkeşlärne nindi programma kötä? Bu häm başka soraularga «Sälät» yaşlär üzäge direktorı Aygöl Gabdraxmanowa häm «Sälät - Arşan» alanı direktorı Kamilla Galautdinowa cawap birde.

Aygöl Gabdraxmanowa: «Sälät - Arşan» alanınıñ üz traditsiyaläre bar»

«Sälät - Arşan» - Sälätneñ iñ berençe, küptänge alannarınıñ berse. 1998 eldan başlap, ul Kara diñgez buenda Anapada häm Tuapseda ütkärelde, xäzer Kırımda Foros bistäsendäge ör-yaña «Sälät – Ak Bars» yaşlär üzägendä uza.

«Sälät - Arşan» alanınıñ bay tarixı gına tügel, açılu däwerennän başlap, bügenge köngä kadär däwam itüçe üz traditsiyaläre dä bar. Şularnıñ berse - «Arşan moñı» dip atalgan cır festiwale. Smena däwamında sälkeşlär, äydamannar üzläre cırlar häm şigırlär icat itep, alarnı täkdim itälär häm bäygedä katnaşalar. Älege icat cimeşlären äydamannar sälkeşlärgä, sälkeşlär äydamannarga häm gomumän Sälätkä bagışlap icat itälär. Ciñüçelärne bilgelägännän soñ, alarnı ber cıentıkka tuplap baralar. Şul räweşle Sälätneñ yaña cırları tua.

«Sälät» yaşlär üzäge direktorı süzlärençä, biredä här yal itüçeneñ kurkınıçsızlıgına aerım igtibar birelä.

Bez kuelgan barlık taläplärgä häm kagıydälärgä yaraklaşabız. Yaña bazada zur, köçle komanda tuplandı. Bezneñ täcribäle meditsina xezmätkärlärebez dä, tabib häm şäfkat tutaşlarıbız da, yözü buença maxsus öyrätelgän instruktorlarıbız da, peşekçelärebez dä bar, kıskası, här ölkädä üz eşläreneñ çın professonalları xezmät kuya. Şulay uk biredä eşläyaçäk äydamannarnı da bez aerım äzerlibez. Monda barlık kurkınıçsızlık taläpläre istä totılgan. «Sälät – Ak Bars» yaşlär üzägendä sälkeşlärneñ uñaylı häm kurkınıçsız şartlarda yaşäwe, ukuı häm yal itüe öçen barlık şartlar da tudırılgan.

Şulay uk, Aygöl Gabdraxmanowa yaña bazadagı yaşäü şartları turında söyläde.

«Sälät – Ak Bars» yaşlär üzäge – zamança taläplär belän eşlängän, bik matur tabigat koçagında, Kara diñgez buenda urnaşkan baza. Anda yaşäü şartları bik yaxşı. Mäsälän, här bülmädä 4 keşe tora häm monda 2 yuınu bülmäse, telewizor, balkon häm konditsioner bar. Territoriyadä maxsus uku bülmäläre, zur futbol kırı, stritbol kırı, trenajer zalı, wolleybol häm tennis uynar öçen barlık mömkinleklär bar. Kiçke çaralarda säxnägä karagan wakıtta, iskitkeç matur taular, aşxanädän Kara diñgez kürenä. «Sälät - Arşan» alanı – cäyne diñgez buenda ozatu häm yaña uku elına äzerlänü öçen menä digän mömkinlek. Balalarga, hiçşiksez, oşayaçak.

Smenanıñ yunäleşe, katnaşuçıları häm uku-ukıtu programması belän «Sälät - Arşan» alanı direktorı Kamilla Galautdinowa tanıştırdı.

«Sälät - Arşan» alanı liderlık sıyfatların üsterü häm mäglümati texnologiyalärne öyränügä bagışlangan. Smena däwamında sälkeşlär şäxsi üseş, proektlar belän idarä itü ölkäsendä belem ala, üz ideyalären tormışka aşıru yulların ezli, älege yunäleştäge zamança texnologiyalär belän tanışa. Däreslärne, ostaxanälärne aldıngı belgeçlär häm ostazlar alıp baraçak. Uku-ukıtu programmasınnan tış, sälkeşlär üzlären sportta, kiçke çaralarda, intellektual uennarda sınap karıy alaçak.

«Sälät - Arşan» alanında Tatarstan, Başkortstan, Kırım, respublikalarınnan, Perm kraenan, Saratow ölkäsennän el däwamında üzlären aktiw kürsätkän lider sälkeşlär häm «Tatar Hack» tsifrlı kararlar eşläü bäygese ciñüçeläre katnaşa.