Rep häm uzgan gasır şigriyate arasında elemtä barmı? Matematika häm biyu ber-bersenä niçek bäyle?

24-30 martta kanikulların Bilärdä ütkärgän ukuçılar bu soraularga cawapnı tögäl belä. Çönki monda «Fänsar» mäktäbeneñ yazgı sessiyase uzdı!

8-11 sıynıflarda ukuçı 75 bala katnaştı. Ölkän sıynıf ukuçıların bergä cıyu - yukka tügel. Çönki alda imtixannar kötä. Şuña wakıtnı mömkin kadär faydalı ütkärergä kiräk. Şul isäptän kanikullarnı da! 

Uku elı däwamında sınaularga äzerlek, kierenkelek häm kurku däreskä bulgan kızıksınunı kimetergä mömkin. Ämma çıgu yulı bar! Häm ul - «Fänsar»da!

Matematika, fizika, informatika, cämgıyat beleme, biologiya, ädäbiyat häm ingliz telennän kızıklı däreslär. Awır temalarnı uen häm ekperimentlar yardämendä añlatu, aralaşu häm dustanä moxit - küpçelek ukuçılar öçen katlaulı häm küñelsez toelgan fännär monda yaña sulış ala. 

Älbättä, uku-ukıtu protsessın yugarı däräcädä alıp baruda abıy häm apalarnıñ öleşe zur. «Här däres - ul unikal protsess. Min balalarnı öyrätäm, şul uk wakıtta alar da mine öyrätä. Birgän sorauları, fiker kiñlekläre şakkattıra» di matematika ukıtuçısı Alsu apa Gataullina.

Mädäni-küñel açu programmasına da zur igtibar birelä. Törle kiçke çaralar, küñelle kwestlar, ostaxanälär - ukuçılar monda imtixan öçen genä tügel, gomumän, tormış öçen dä kiräkle belemnär ala.