Täwäkkällärgä kurıkma: ARTS BILER FORUM-ga kil! ← kire kaytirga
«Kurıkmacka, üz-üzegezgä häm yaratkan şögılegezgä härçak tugrı kalırga» - dip kiñäş birä ARTS BILER FORUM-nıñ muzıkal yunäleşe citäkçese Zärinä apa Wildanowa.
«The Cheeklaweek» muzıkal proektı awtorı häm citäkçese, Räsäyküläm häm xalıkara wokal konkursları häm festiwalläre laureatı, «Yummy music» bäysez muzıkal leyblı artistı belän bıelgı ARTS BILER FORUM – yañalıklar, üzgäreşlär häm traditsiyalär turında söyläşep aldık.
- Zärinä, ARTS BILER FORUM katnaşuçılarga nindi mömkinleklär birä?
- ARTS BILER FORUM - ul sälätle yaşlär häm üz eşläreneñ ostaları ber mäydanda oçraşıp, täcribä urtaklaşa torgan urını. Berençedän, biredä balalar ber-berse belän aralaşa. Ikençedän, Räsäyneñ häm Tatarstannıñ tanılgan icat keşeläre belän dä tanışalar, ostaxanälärendä katnaşalar. Törle ölkä ekspertları belän üz icatıñ turında söyläşep buluı da bik zur östenlek. Öçençedän, bıel muzıkal laboratoriyalär bulaçak, balalar üzläre muzıkantlar belän yaña cır yazdırıp karıy alaçak. Östäwenä, ARTS BILER FORUM yal itü häm yañalıklarga öyränü mömkinlege.
- ARTS BILER FORUM-nı oeştıruda täcribäñ zur, uzgan ellar belän çagıştırganda üseş sizeläme?
- Älbättä, üseş sizelä. Bezneñ ARTS BILER FORUM-da el saen katnaşa torgan laureatlarıbız bar. Alarnı küzätep barabız. Balalar tagın da yugarırak däräcädä çıgış yasıy. Alarga sıyfatlı material birergä tırışabız, şuña kürä eldan-el köçleräk spikerlar kilä. Bıel forumnıñ ozınlıgı da arttı. 2 kön östälde. Yagni kübräk wakıt, kübräk spikerlar, kübräk mömkinlek digän süz! Monda da forumnıñ üseşe kürenä, minemçä.
- Katnaşuçılarga nindi teläkläreñ bar?
Iñ möhime, kurıkmaska. Nigezlämä buença, muzıka yunäleşendä katnaşu öçen tatar telendä cır başkarırga kiräk. Häm bu kayberäülärne kurkıta. Ämma küplär forum öçen tatarça cır öyränep kilä. Şul räweşle, repertuarları da bayıy, masştablı, yugarı däräcäle çarada katnaşırga da mömkinlek tua. Dimäk, kurıkmaska, härwakıt alga omtılırga häm üz maksatıña, üz-üzeñä tugrı kalırga kiräk!
ARTS BILER FORUM-ga 14 nçe mayga kadär terkälergä bula (kollektiwlar öçen, indiwidual garizalar)