Aleksandr Terentew: «Sälättä yaşlär tatar telen häm traditsiyalärne saklap kalırga omtıla» ← kire kaytirga
Tatarstan Respublikası Prezidentı Apparatı citäkçese urınbasarı – Tatarstan Respublikası Prezidentınıñ Eçke säyasät mäsäläläre departamentı citäkçese Aleksandr Terentew X Xalıkara «Sälät» yaşlär uku-ukıtu forumınıñ LEADERS BILER FORUM smenası katnaşuçıları belän oçraştı.
Çarada lidernıñ nindi sıyfatlarga häm üzençäleklärgä iya bulırga tieşlege turında söyläştelär. Tormışta häm eşmäkärlektä niçek uñışka ireşergä? Yaşlär säyasät eşlärendä katnaşırga tieşme? Sälkeşlär Tatarstan Prezidentı Apparatı citäkçese urınbasarına üzlären kızıksındırgan şuşı häm başka soraularnı yulladı. Cämgıyattä lidernıñ ähämiyatenä aerım igtibar birelde.
«Forumga fikerle, añlı balalar cıelgan. Üsep kilüçe buınnıñ üz ideyalären täkdim itüe bik möhim, çönki kiläçägebez alar kulında. Respublikada yaşlärneñ initsiatiwası inde uñışlı tormışka aşırıla», – dip äytte Aleksandr Terentew.
Sälätneñ barlıkka kilüe häm kiñäyue dä aktiw tatar yaşlär initsiatiwası buluın bilgeläp ütte ul. Tatarstan Prezident Apparatı citäkçese urınbasarınıñ süzlärençä, xäzerge wakıtta berläşmä däülät üseşenä uñay yogıntı yasauçı möhim xäräkät statusına iya.
«Sälät – zur tatu gailä ul. Fän, mägarif, mädäniyat häm sängat ölkäsendä uñışka ireşkän keşeläre dä bik küp. Şunısı möhim, alar üzlären Sälät moxitendä tärbiyalänüçelär dip sanıylar. Biredäge keşelär härwakıt ber-bersenä yardäm itä. Monnan tış, kızıklı sotsial initsiatiwalar da täkdim itälär. Xäzerge wakıtta Sälät – talantlı balalarnı tabu, alarga üz säläten kamilläşterergä yardäm itü öçen sıyfatlı mäktäp. Biredä sälkeşlär duslık häm tatulıknıñ kıymmäten añlarga öyränä. Tatar telen häm traditsiyalärne saklap kalırga omtıla başlıy», – dip bilgeläp ütte Terentew.
Isegezgä töşeräbez, 29 iyuldä Bilär muzey-tıyulıgında X Xalıkara «Sälät» yaşlär uku-ukıtu forumı kısalarında Rossiya mäktäp ukuçıları xäräkäteneñ Bötenrossiya «Ekotrend» smenası başlandı. Masştablı çarada ilneñ 17 töbägennän cıelgan aktiwistlar katnaşa. Balalar ekologiya yunäleşendäge iñ kisken dönyaküläm problemalarnı barlıy, alarnı xäl itüneñ ısulların täkdim itä.