Известны имена победителей Ежегодной премии «Сәмрух»
29.02.2024
El bue kötkän tantana. «Piramida» mädäni-küñel açu üzägendä IX respublikaküläm traditsion «Sämrux» premiyase tapşırıldı. El däwamında «Sälät» xäräkätendä aktiw katnaşkan talantlı balalar häm yaşlär büläklände. Sämrux koşı sının alu bäxete bıel kemgä elmaygan?
Tugızınçı märtäbä uzdırıluçı premiyadä 9 töp nominatsiya buença ciñüçelär saylandı. 9 el däwamında älege çarada 625tän artık keşe katnaşkan, 74 ciñüçe bilgelängän. Bıel bäygegä 150dän artık gariza kabul itelgän.
«Sez – kiläçäkkä ömet». Katnaşuçılarnı Tatarstan Premer-ministrı urınbasarı, Bötendönya tatar kongressınıñ Milli şura räise Wasil Şäyxrazıew sälamläde.
– Bügen biredä tatar milläteneñ kiläçäge cıelgan. Respublika citäkçelege häm şäxsän üzemneñ isememnän 30 ellık tarix belän sezne täbrik itep, sezgä räxmät äytäm. 30 eldan soñ da monda oçraşırga yazsın. «Sälät»tä inde ber buın tärbiyalängän. Iñ möhime – sezneñ tormışta üzegezne tabuıgız. Ul wakıtta: yarıy äle üz wakıtında «Sälät»kä kilep eläkkänmen, äybät keşelär belän oçraşkanmın, dip äyterlek bulsın. Şuşı «Sälät»tän çıkkan bezneñ laeklı citäkçelärebez bar. Çönki bu platforma, üzeñne açıp, alga barırga mömkinlek birä, – dide Wasil Şäyxrazıew.
Tatarstan yaşlär eşläre ministrı Rinat Sadıykow ta sälätlelärne bäxetle buın dip atadı.
– Sez – bik bäxetle buın, şäxes bularak üseşegez öçen barlık mömkinleklär tudırılgan. «Sälät» ul – tarix, bu tarixnı üsterik, saklıyk, nıgıtıyk, – dide ministr.
«Sälät» yaşlär üzäge direktorı Aygöl Gabdraxmanowa el däwamında «Sälät»ne üstergän, «Sälät» xäräkätendä aktiw katnaşkan talantlı balalar häm yaşlärgä räxmät belderde.
– Sez – «Sälät»ne «Sälät» itüçe keşelär, «Sälät»neñ komandası, gailäse. «Sälät»ne nıgıtuıgız, üsterüegez öçen barlık sälätlelärgä, alarnıñ äti-änilärenä, ostazlarga, partnerlarıbızga zur räxmät! Eşçänlegebezne xuplauçı, härwakıt yardäm itüçe Räisebez Röstäm Miñnexanowka, barlık ministrlıklarga, alannarıbız uzuçı rayonnarga aerım räxmätemne citkerergä telim, – dide ul.
IX «Sämrux» el premiyase ciñüçeläre
- «El sälkeşe» – Säet Srurow
- «El äydamanı» – Ilziya Näcipowa
- «El kuldaşları» – Älfir Zinnätullin häm Elwina Gatiyatullina («Sälät – Akbüre»)
- «El ölkän äydamanı» – Elina Säxäbiewa
- «El metodistı» – Röstäm Fatıxow
- «El direktorı» – Kamilä Rizwanowa
- «El alanı» – «Sälät – Tel»
- «El klubı» – «Sälät – Saba» klubı
- «Sälät» cırlıy» – «Toyam» – «Sälät – Cisem» alanı cırı