В Билярске стартовала творческая смена форума «Сәләт»

Bilärdä XII Xalıkara «Sälät» yaşlär uku-ukıtu forumınıñ ikençe smenası — Icat Bilär Forum (Tworçestwo /Arts) eşli başladı. Smena näticäläre buença katnaşuçılar üz ostazları belän komandada buldırgan icadi proektlar täkdim iteläçäk. Smena 5 iyulgä kadär däwam itäçäk.

Smenanıñ açılu tantanasında sälamläü süze belän Tatarstan Respublikası Yaşlär eşläre ministrı urınbasarı Aygöl Sabirowa çıgış yasadı.

«Bügen izge Bilär cirendä törle töbäklärdän kilgän katnaşuçılar cıeldı. Sez - iñ sälätle balalar, häm bez sezneñ monda elägü öçen zur yul ütüegezne bik kaderlibez. Alda sezne kızıklı programma, yaña tanışular häm, älbättä, onıtılmaslık xis-kiçereşlär kötä», - dip bilgeläp ütte ul.

Icadi smenada 14 yaştän alıp 22 yaşkä kadärge 600 bala häm yaşüsmer katnaşa.

Katnaşuçılarnıñ geografiyase: Tatarstan Respublikası, Başkortostan Respublikası, Çuwaş Respublikası, Ulyanowsk ölkäse, Samara ölkäse, Mari El respublikası, Wolgograd ölkäse, Ästerxan ölkäse, Mäskäü şähäre, Sankt-Peterburg şähäre.

Icat Bilär Forum (Tworçestwo /Arts) Tatarstan Respublikası Prezidentı Röstäm Miñnexanow kuşuı häm yardäme belän 2018 eldan ütkärelä. Traditsion räweştä smena biyu, muzıka, teatr yunäleşläre buença laboratoriyalär formatında uza. Katnaşuçılar, icadi törkemnärgä berläşep, ostazlar belän kollaboratsiyadä yaña icadi proektlar äzerläyaçäk häm smena yabılışında alarnı täkdim itäçäk.

Muzıka yunäleşen cırçı, aktrisa, wokal buença ukıtuçı Zärinä Wildanowa citäkli, teatr yunäleşe G.Kariew isemendäge Tatar däülät yaş tamaşaçı teatrı akterı häm rejisserı Liliya Nurel citäkçelegendä uzaçak. Biyu yunäleşe citäkçese - xoreograf, biyuçe häm ukıtuçı Wenera Galimowa.

Icadi laboratoriyalär kuratorları: Kseniya Burmistrowa, Regina Lanwin, Säydä Minubaewa (biyu), Nikita Sawelew, Dmitriy Balakin, Timur Milyukow, Sergey Kostyujow (muzıka), Ilnur Garifullin, Regina Sattarowa, Kamil Gataullin (teatr).

Ostaxanälärne häm katnaşuçılar öçen icadi oçraşularnı muzıkant häm cırçı Sergey Kostyujow, cırçı Karina Cihanşina, muzıkal prodyuser Yana Kozlowskaya, kloun Ruslan Rimanas, rässam Alinä Älimowa, pedagog-xoreograf Saydä Minubaewa, xoreograf Nadejda Onso, biyuçe Regina Xäliullina, prodyuser häm muzıkant Timur Milyukow, teatr rejisserı häm akterı Kamil Gataullin, Folk group Zakariya häm başkalar ütkäräçäk.

Forumda kollektiw citäkçeläre öçen maxsus «Ostaz» uku-ukıtu programması üz eşçänlegen däwam itäçäk. Proekt kısalarında balanı şäxes bularak tärbiyaläü, dustanä mönäsäbätle kollektiw buldıru, anı üsterü temalarına bagışlangan sessiyalär häm ostaxanälär uzaçak.

«Bez ukıtuçılar täcribä urtaklaşa häm professional üseş ala torgan moxit buldırırga telädek. Uzgan el bez bik cılı kaytawaz aldık, häm bıel programma tagın da uñışlırak bulır dip ömetlänäbez», - dip urtaklaştı «Ostaz» proektı citäkçese Dilärä Yakubowa.

«Ostaz» spikerları arasında Tatarstan häm Rossiyaneñ äydäp baruçı mädäniyat häm sängat eşlekleläre: Nurbäk Batulla, Islam Waleew, Bulat Minkin, Krestina Polewaya, Yuriy Fedorow häm başkalar.

Smena kısalarında Rossiyaneñ häm Tatarstannıñ atkazangan artistı, teatr häm kino aktrisası Roza Xäyrullina belän icadi oçraşu bulaçak.

Forumda «Canlı Sälät» (SeletLive) turıdan-turı efirlar studiyase üz eşen däwam itäçäk. Translyatsiyalär forumnıñ WKontakte häm YouTube räsmi akkauntlarında alıp barılaçak.

Icat Bilär Forum (Tworçestwo /Arts) smenası mömkinleklär kiñlege bulıp tora, anda katnaşuçılar icadi laboratoriyalär kısalarında belgeçlärdän unikal belemnär häm kiñäşlär alalar, üzlären kürsätälär, uku-ukıtu häm mädäni programmalarda kompetentsiyalären kamilläşterälär, başka katnaşuçılar häm belgeçlär belän hönäri, mädäni elemtälär urnaştıralar, törle yunäleşlär häm janrlarnıñ üzençälekläre, şulay uk üzläre saylagan yunäleş kısalarında yaña tendentsiyalär belän tanışalar, alga taba üseşkä impuls alalar.

Xalıkara «Sälät» yaşlär uku-ukıtu forumı Tatarstan Respublikası Xökümäte, TR Yaşlär eşläre ministrlıgı häm TR Mägarif häm fän ministrlıgı yardäme belän uzdırıla.

Çıganak: https://mincult.tatarstan.ru/tat/index.htm/news/2211846.htm